"Sovetski" hər gün dəyişir - yol infrastrukturu müasirləşir - VİDEO / FOTO

20 Aprel 2017- 00:00
11

   

          Bakı şəhərinin Yasamal rayonu ərazisində Füzuli meydanı və Təzəpir məscidi kompleksinin ətrafındakı yol infrastrukturunun yaxşılaşdırılması istiqamətində Azərbaycan Prezidenti İlham Əliyevin sərəncamlarına müvafiq olaraq “Azəravtoyol” ASC tərəfindən ümumi uzunluğu 7.6 km-ə yaxın olan 5 küçədə aparılan yenidənqurma işləri yekunlaşmaq üzrədir.

 

          Artıq bu çərçivədə işlərin 85 faizi aparılaraq yekunlaşdırılıb. İşlərin tam olaraq yekunlaşdığı 440 metr uzunluğunda və genişləndirildikdən sonra eni 15 metrə çatan  Balababa Məcidov küçəsindən başqa, hazırda Abdulla Şaiq, Mirzəağa Əliyev və Füzuli küçələrində də son tamamlanma işləri görülür.

  

          Uzunluğu 1825 metr, genişləndirildikdən sonra eni 15 metrə çatan Abdulla Şaiq küçəsində asfalt-beton örtüyünün son qatının döşənməsi, piyada səkilərinə tamet daşların döşənməsi və işıqlandırma sistemin qurulması işləri qalıb ki, bu işlər də yaxın müddət ərzində aparılaraq yekunlaşdırılacaq.

 

          Müasir yol infrastrukturunun yaradılması istiqamətində Nərimanov prospektinin 2165 metr uzunluğunda olan hissəsində genişləndirmə və torpaq işləri yekunlaşıb, yeni yol yatağı inşa olunub. Yol boyu yeni kommunikasiya xətlərinin çəkilişi işləri isə bitmək üzrədir.  Hazırda 500 m-lik ərazidə asfaltlanma işlərinə start verilib. Burda fiziki işlərin göstəricisi 60% təşkil edir. 

 

          Akademik Milli Dram teatrının hər iki tərəfində yerləşən Mirzəağa ƏliyevFüzuli küçələrində də aparılan yenidənqurma işləri son mərhələsindədir. Küçələrin uzunluqları müvafiq olaraq 750800 metr təşkil edir. Bu küçələrdə yenidənqurma işləri çərçivəsində yol genişləndirilərək 15 metrə çatdırılıb.

 

          Hər iki küçədə ümumi işlərin 90%-i yekunlaşdırılıb. Küçələr boyu yeni kommunikasiya xətləri çəkilib, 2 qat olmaqla asfalt-beton örtük döşənib. Küçələrdə asfalt örtüyünün son qatının döşənməsi, piyada səkilərinin tikintisi və işıqlandırma işləri qalıb ki, yaxın günlərdə bu işlər də yekunlaşdırılacaq.

 

          Onu da əlavə edək ki, hazırda Nərimanov prospekti və Abdulla Şaiq küçəsinin “Statistika dairəsi”nə, həmçinin N.Nərimanovun heykəlinin yerləşdiyi dairə istiqamətinə birləşdirilməsi işləri aparılır. Analoji işlər Füzuli və Mirzəağa Əliyev küçələrində də görülür. Belə ki, sözügedən küçələr “Füzuli meydanı”na birləşdirilir.

 

          Bundan başqa layihə çərçivəsində Füzuli küçəsinin Səməd Vurğun küçəsi ilə kəsişməsində yeni 2 hərəkət zolaqlı geri dönmə hissə də yaradılıb.

 

          Qeyd edək ki, yenidən qurulan küçələrdə layihə üzrə 14 ünvanda “cib”lik və müasir avtobus dayanacaqları qurulacaq, yeraltı və yerüstü parkinq yerləri tikiləcək.

 

          “Azəravtoyol” ASC-nin rəhbərliyinin xüsusi nəzarəti altında sözügedən küçələrdə sürətlə və ən əsası keyfiyyətlə aparılan işlərin may ayında yekunlaşdırılması nəzərdə tutulub. Bunun üçün əraziyə lazımi sayda qüvvə cəlb olunub və iki növbəli iş qrafiki müəyyən edilib.