Lənkəranda sel sularının dağıtdığı körpü yenidən inşa edildi - VİDEO / FOTO

12 Fevral 2018- 15:02
11 Lənkəranda sel sularının dağıtdığı körpü yenidən inşa edildi - VİDEO / FOTO

Lənkəran rayonunun Əşlə kəndində sel nəticəsində dağılan körpü yenidən tikilərək istifadəyə verilib. 

 

Azərbaycan Avtomobil Yolları Dövlət Agentliyi tərəfindən yüksək keyfiyyətlə inşa olunan körpü R-48 Lənkəran-Lerik avtomobil yolunun 14-cü kilometrliyindən ayrılan və Əşlə kəndinə gedən yolun 1-ci kilometrində, Lənkərançay üzərində yerləşir.  

 

Uzunluğu 42 metr, eni 4.5 metr və 3 aşırımlı olan dəmir-beton konstruksiyalı körpü 2 ay inşa edilib. Avtomobil körpüsü A-8, NQ-60 hesabi yükünə hesablanıb.

 

Tikinti işləri çərçivəsində körpünün altında, çay məcrasında monolit-beton bünövrə tökülüb. Bünövrəyə əlavə dəmir borular qoyulmaqla yeni dayaqlar inşa olunub və körpünün altından aşırım tirlərinə bərkidilib. Bu işlər bünövrənin sel daşqınları zamanı sıradan çıxmasının qarşısını almağa hesablanıb. Betonlama işləri yekunlaşandan sonra körpünün üstü asfaltlanıb.

 

Xatırladaq ki, sözügedən körpü ötən il oktyabrın əvvəllərində intensiv yağıntılardan sonra dağılmışdı. Nəticədə rayon mərkəzi ilə 15 kilometrlik məsafəsi olan kəndin birbaşa əlaqəsi kəsilmişdi. Sakinlər alternativ yol kimi Siyabili kəndindən keçən yoldan istifadə edirdi.

 

Yeni tikilmiş körpü 2 minə yaxın əhalisi olan 4 yaşayış məntəqəsini – Mollakənd, Siyobili, Rvo və Əşlə kəndlərini birləşdirməklə yanaşı, həm də yerli sakinlərin Lənkəran-Lerik avtomobil yoluna çıxışını təmin edir.